「以前啲明星」和「而家啲明星」最大的分別是 —「以前啲明星」買衫著「而家啲明星」借衫著！
 

以前即係幾時？

 
「以前啲明星」，如果對自己造型有點要 求的，覺得用靚衫和靚樣招待觀眾是演出的一 部分，也是表演者的一種「道義」的話，收入 有一大截會用了來買衫置裝；「而家啲明星」， 就算有些也算非常貪靚的，也認同「令米飯班 主感覺養眼」是服務的package之一，有時 也可以一整季都不用花斗零在行頭上面（就算 有都只花在stylist的人工上，well，也許還得 買點底衫褲和鞋，總之不用買衫啦），因為時 勢不同玩法不同了，好多以前非得真金白銀才 能一親香澤的名廠名牌，如今都排着隊等着借 你著，還擔心你不打電話去申請，幾乎要像銀 行借錢般cold call 你㖭。
 
而所謂以前，其實十零年前，因為我肯肯肯定，零七零八零九那幾年，即使已有品牌開始紆尊降貴中門大開供明星借衫，但我仍然有幫過我一些藝人朋友買衫去出席重要場合的，可見大家還未完全是一味靠借。
 
但到了我舉行Concert YY的2012年，我 記得幾乎已沒有任何有點名氣的藝人會「吟荷 包」買衫出席公眾場合了（利申：那次演唱 會95%衣服都是靠各大品牌鼎力支持借回來 的），唯一分別只是大有大借細有細借，大品 牌要紅星才借到，二三四五線品牌的商借對象 也是成正比的「門當戶對」。

「漏夜買衫」的時代

 
我1990年加入電台工作，所以肉眼見到的「明星服裝內幕」可從那時計起！是的，我還清楚記得1991年那屆叱咤樂壇頒獎禮，當晚拿下「叱咤生力軍（女）金獎」的吳婉芳，差不多開場才上氣唔接下氣地穿著一套螢光綠色的Montana趕到紅館，事後她告訴我：「好險，喺九龍酒店搵衫搵到傍晚六點幾先搵到呢套！」
 
沒錯，在那個年代如果你不想出現這種危 險鏡頭，害怕有任何大場面翹起手「無衫著」， 你就得平時趁得閒一早買定好多好多的衣服， 通常多到季尾都穿不完，因為沒有任何一位蘇 民峰麥玲玲可以準確算得出你今年總共有28次 登台，31次上電視，16個press con，65本雜誌影相……
 
曾幾何時，服裝費的確是每個藝人最甘而最無得慳的投資。
 
講開又講，有一次問起「前輩」吳君如某 年某件我見過她穿上電視的Kansai Yamamoto 的下落，「一早還返俾劉嘉玲lu ！」她說。
 
？？？？？？？？？？（我一頭黑人問號）
 
原來當年她們幾姊妹剛從訓練班出來不久，賺錢不算多但百物騰貴，個個想著靚嘢的姐仔們，唯有每人買每幾件新衫輪流著，即是嘉玲買了件Kansai自己新劇開鏡先穿了，然後轉借君如做《歡樂今宵》，穿完華倩再接手著去金獅影視剪綵，如果還未著殘仲可以俾戚美珍海城大酒樓登多次台，反正那時的報紙雜誌電視電台數量有限，只要條數計得準確再加配搭巧妙，應該很少眼利又無聊的觀眾能捉到正「嘩！佢又著同一件舊衫第三次！」又或者「哦～佢哋一件衫五份著！」
 
唱歌演戲工作已很辛苦，「以前嘅明星」還要撥出不少時間親手照顧自己的styling，但以前人人都這樣，所以多艱難都是必經的預咗的，這一代藝人大概發夢都想不到，十零二十年後，連LV、Valentino、Dior都唔使俾錢買，打個電話便體貼地送到府上借你穿咁便宜吧！

又賴互聯網？

 
但是除了互聯網的流行普及，我再也想不到另一個原因，會令那些本來高高在上，要付上大疊鈔票不特止，分分鐘還要專程飛十幾小時才有機會買到的國際名牌HighFashion，會由「疊埋心水賺硬你」一夜之間變成「免費投懷送抱之餘還擔心你唔著」那麼平易近人。
 
是呀，只要那幾家龍頭老大揸緊宗旨 「死都唔免費借」，那些大明星們還是得死 死地氣忍痛碌卡吧？是誰第一個守唔住先打 開了那個閂唔返的「潘朵拉盒子」已經無從稽考，但放下身段的原因則很可能是某個明 星或者網紅某天穿了某件衫拿了某個袋引來 排山倒海的媒體coverage（尤其電子的網上 的），於是有些PR便覺得「橫豎都係搏版位 啫，俾啲名人明星著吓又爆紅，方便過我自 己每日又跪又求啲fashion editor同記者俾個 面高抬貴手啦！」但與其等Angelina Jolie 從幾百個牌子之中揀中你果件嚟買咁渺茫， 不如你主動出擊敲佢門免費借俾佢仲借埋俾 Sarah Jessica Parker 同 Kate Moss 同阿邊個邊大包圍啦……

The post Wyman Wong：<span class="zh">明星「借衫」簡史</span> appeared first on MING'S.