Wyman Wong：「靚和舒服的戰爭」時裝精初老指南（二）

（接上期）

其他人怎樣才算老我唔知，但時裝精「上咗年紀」的徵象我就知知知知知！

以下形容，中三樣，已經係！（不過通常一係唔中，一係中晒，好少只得三樣。）

1. 見櫈就想坐（專坐人哋皮鞋部要嚟試鞋嗰啲櫈，坐到真係要試鞋嗰啲人無位坐都唔捨得起身，旁人白眼詐睇唔到）。

2. 兩個街口都要坐車（的士司機咿咿哦哦早已免疫）。

3. 買咗嘢都唔想拎（如果間shop唔送貨情願唔買）。

4. 節目與節目、appointment 與appointment之間，本來可以逛街，但情願返屋企或酒店（並且開始認真諗係咪應該請返個司機俾自己）。

5. 如果在外地放假，晏起身晏出門不在話下，明明百貨公司收八點，你開始肯行到七點或者更早就投降（成日唔出酒店呢個idea諗諗吓你都好似唔介意）。

6. 飲多咗好多茶同食咗好多明明食唔落嘅snacks，因為你每行個零兩個鐘頭街又話「唔得喇」要搵間coffee shop坐吓攤唞吓（所以常去的購物區邊度有café你完全熟晒）。

至於買嘢咯喎，你將會以一套全新標準來衡量應否成交，以前你一味只要靚，而家，你又「要舒服」又「要方便」。

有時候，「舒服」甚至戰勝了「靚」，你連自己都嚇親了！

要舒服

上期講到，以前細個完全唔明點解啲熟年人士買冬褸竟然要輕，到你明的時候，你又調轉頭覺得後生時肯孭件廿磅重嘅大褸出街unbelievable！

這種「唔舒服就勢係假」的長者心態還會體現於其他方方面面……

窄身衫？黐線啦！Cutting唔好著得你稍為「唔自在」一啲你而家都唔肯制啦，至於那些沒有必要露的肉……一把年紀，人貴自知，不如藏拙啦。

質地方面，太硬唔著、拮肉唔著、會鼻敏感唔著，唔索汗唔著……呢啲後生著過晒啦！（我個人方面還加多一樣，「會被人懷疑我扮青春的」都唔著！）

然後行路唔方便的窄裙、拖地褲腳、鬆糕鞋之流，一律唔考慮，邊行邊受罪事小，最大鑊是你開始聽到很多人說，不少老人健康直插谷底的轉捩點是因為「嗰次跌一跌」。

唔方便

其實上文「不良於行」已經開始了「唔方便」這一款新大忌。

除此之外，老人是很喜歡方便的橡筋褲頭裙頭，無袋或個袋開得唔就手的衣物統統大扣分（沒錯，「可以插袋」同「有得袋嘢」對老人來說是非常非常重要的），事實上有些結構比較複雜，著上身要搞一輪搞到身水身汗，除嗰陣又要搵人幫手先除到的，都避之則吉。

就本人而言，近年越來越少幫襯那些十幾廿個窿的綁帶長靴，如果有拉鍊就還好，否則你要我「烏」低身綁一輪先出到街，就幾靚都咪搞，即使我本人通過我腰骨都唔OK，那些一定要搵兩名大漢才除得甩的橡筋boots當然滾開，費事夜晚連累屋企人幫手除，簡直大手術一樣，佢唔黑面我自己都唔好意思……所以鞋方面，如果你發現自己現役那些都以slip on的「懶佬鞋」為主，恐怕你唔認老都唔得了。

如果作為一名時裝精，隨着年齡增長會有不同階段之分，那麼我到了快50歲的今天起碼已經歷了三個：

第一階段：和朋友吹水交換的是「哪個品牌的衣服最潮？」

第二階段：和朋友吹水交換的是「哪個品牌的護膚品最神奇？」

第三階段：和朋友吹水交換的是「哪個品牌的染髮劑最有效？」

還有沒有第四五六個階段呢？還是以後就什麼都不care呢？我還未去到，到咗話你聽！ 但我懷疑就算不是「哪個品牌的壽衣最有型？」都會是「哪個品牌的休閒服家居服最方便看護姑娘幫你除著？」

（本篇完）