老闆被同事仔激到嘔血，時時都發生。我也做過fresh grad，也有矇查查的時候，好在十幾歲出來拍戲做model，大學畢業前做過公司admin、做過餐廳waitress，零碎的工作經驗教曉我少少應有的工作態度。一個員工，到底如何量度自己｢做得好唔好｣？效率、planning、strategy、刷鞋、搞人際關係？在我看來以上答案已經太far-fetched，不如檢視分內事點先為之做得好？
第一，交不低於90分的功課。
何謂功課？簡單如一個email，title是否清晰，把對方所需資料鋪陳，加入你的input，有無推進到件事，收件人睇唔睇得明你要他下一步做什麼、有無全數回答對方上個email問你的問題，還是要1,000次back and forth，有無加齊應有的attachment，name好每個attachment。一個excel或presentation，有無錯字錯formula錯header 錯sub-total，會否過於簡單或複雜，表達手法是否audience-friendly，格式標點小數點是否consistent。做marketing就看你手字，寫facebook feed有花心思還是交全無個性的行貨，切入點有無新意或追貼大眾話題，再來就是有無typo、打錯價錢或post錯link。
當你交60分的功課，上司一開你個email就頭痛要幫你找錯處再改正，第二日仲要花多十分鐘hold hand教你點做好份嘢，教得你多，你又嫌上司家長式管理。交110分的功課是要下苦工不斷練習，變為習慣，讓上司每次都對你另眼相看，大家happy。
我fresh grad後做MT rotate去不同部門，上至下都金睛火眼睇住我有無表現，時時刻刻都要交110分功課，仲不時要有創新想法propose俾老闆。不過我好慣，由細到大讀書做嘢都要strive for excellence，香港處處競爭激烈，幾時輪到我hea住做？我最想過經濟獨立的生活，早就知道每做一件事都必須比其他人付出多好多分力。每天做多1%，累積五年、十年，就會看到截然不同的人生。
第二，跟嘢跟得好唔好，follow-up and follow through。
開完一個會有一大堆事情要跟進，要經消化、整理、列出to-do list，向不同部門取材，先取最趕的。send了email俾external party但影都無就打電話追，在同一個office就行兩步面對面再講一次你需要乜，免得對方誤會，到時俾錯料你就等於白等幾日。任何部門同事、上司或外面的合作夥伴只會鍾意同跟嘢跟得足的人共事，無論你幾高幾靚仔，跟嘢跟得差無人會尊重你。
如果要老闆追你嘢、提你，sorry，你已經遲咗。叻的員工係可以幫老闆執漏，而唔係老闆幫你執漏。大頭蝦就要學識用工具，例如mark calendar、email打星星、將email “add to task”，不在email的follow up就用筆記簿原子筆寫低，畫一個方格在to-do前，做好就剔，不時翻閱筆記簿，把遺漏的to-do用螢光筆highlight多一次提醒自己，再不時前思後想每項工作的priority。如果個follow through需時，便不時向上司匯報進度：做咗乜，爭緊乜，預計幾時會做完，上司唔需要掛心你，就會對你有好印象。相反，甩嘢，然後驚動到各個部門要幫你執漏、趕工，仲要道歉都無聲，賴天賴地，最唔要得。
當你做好一件小事，上司會放心俾件難度高少少的事你試，無幾耐，收到升職信！喔，原來不知不覺你已經做緊上一級title做到的事。
第三，學習。老闆會睇邊個學嘢快、有心學。
舉例，我公司每個月推出新產品，marketing同事要預備產品的銷售天書FAB（feature-advantage-benefit）俾前線同事，每份FAB都要經過我驗屍咁驗，務求將產品寫到最正最吸引，令前線同事有信心推薦俾客人。FAB亦是我拍攝產品影片的內容來源，因此marketing同事寫FAB都好大壓力，亦好怕同我一對一改FAB，因為有時我會將份嘢改到體無完膚，等於要同事從頭做過。在我來看，一對一改FAB是難得一個我可以慢慢教同事做copywrite的機會。而做marketing，枝筆唔好係唔會有成就，所以無論幾勞氣我都要親自教。一個FAB可以好dry，什麼去角質保濕多功能blah blah blah全部都係字，睇完都唔記得；但亦都可以好好玩。每個產品背後都有一個故事，成分的故事，創辦人的故事，故事可能是講述科技，可能是講述人性，做marketer就是要發現甚至發明這個真摯的故事。至於technical write up，技巧就是簡短易明容易記、用字精準、不重複不婆媽。可以加入圖表、臨牀實證植物成分相片，令FAB變得有趣。上心的同事掌握到我的說話，一理通百理明，下次交來的FAB已經看出她學識幾招武功，我here and there提點一下，改多一次就final。相反有些同事一路聽我講，一路哦哦哦，我話點改就搬字過紙咁改，再交番份功課上來，就知道佢根本有hear無listen，亦唔想學。學識你上司或老闆的全套武功，將來你就可以成為他們，真係咁簡單。
由Fresh grad到manager到CEO，都要做好以上三件事，不論你公司在任何狀態，under什麼leadership，這三件事是自己對自己的要求，同其他人無關。總之記住，每天做多1%，累積五年、十年，你就會看到截然不同的人生。
Comments